Shawdırbay Seyitov
Belgili shayır hám jazıwshı Sh. Seyitov 1937-jılı 16-martta Túrkmenstannıń Góne Úrgenish rayonındaǵı Seyit shúrteniń qalası degen jerde tuwılǵan. Sh. Seyitovtıń 1942-jılı shańaraq aǵzaları Nókiske kóship keledi.
Dóretiwshilik jolın poeziyadan baslaǵan. Sh. Seyitov 60-jıllardıń basında balalarǵa arnap «Úshpelek» (1964) dep atalǵan qosıqlar toplamı menen kirip keldi. Sońınan shayırdıń «Soqpaǵım meniń qaydasan» (1966), «Tawlardan saza» (1970), «Jollar» (1982) poeziyalıq toplamları menen bir qatarda «Kóp edi ketken tırnalar» hám «Qashqın» (1969) sıyaqlı dáslepki povestleri hám «Iǵbal soqpaqları» (1975) dep atalǵan birinshi romanı basılıp shıqtı. Poeziya janrı menen prozada teńnen qálem terbetken jazıwshı endi iri kólemli shıǵarmalar dóretiwge qol urdı. «Isine qosıp tigilsin» povesti menen «Shirashılar» (1986) romanı hám tórt kitaptan ibarat «Xalqabad» tetralogiyası (1978-1990) menen «Jaman shıǵanaqtaǵı Aqtuba» (1992) гоmanları izli-izinen basılıp shıqtı.
Sh. Seyitov kórkem awdarma salasında batıs hám shıǵıs ádebiyatınıń belgili sóz sheberleri Hafız, Ferdawsiy, Nawayı, Pushkin, Lermontov, L.Tolstoy, Korolenko, Nekrasov, Maqtımqulı, Abay, S. Ayniy, A. Mátjannıń poeziyalıq hám prozalıq shıǵarmaların qaraqalpaq tiline awdardı. Óz gezeginde shayır-jazıwshınıń kórkem shıǵarmaları da tuwısqan qazaq, ózbek, rus tillerinde basılıp shıqtı. Sh. Seyitov dóretiwshilik islerinde qaraqalpaq awızeki ádebiyatı, klassikalıq ádebiyatı menen jazba ádebiyatın qala berse batıstıń hám shıǵıstıń ullı sóz sheberleriniń shıǵarmaların qunt penen úyrenedi. Bul álbette, kórkem ádebiyat tarawında Sh. Seyitovtıń jemisli islewine óziniń paydalı tásirin tiygizdi hám óz ustaxanasına iye jazıwshılardıń qatarınan orın iyeledi. Solay etip, poeziya, proza ham awdarma salasında da tınımsız qálem terbetken talant iyesi Sh. Seyitovqa 1989-jılı Berdaq atındaǵı mámleketlik sıylıqtıń laureatı, 1990-jılı Qaraqalpaqstanǵa miyneti sińgen mádeniyat xizmetkeri, 1992-jılı Qaraqalpaqstan xalıq jazıwshısı sıyaqlı húrmetli ataqları beriledi.
Shawdırbay Seyitov talantınıń áyne gúllengen waqtında 1996-jılı 59 jasında qaytıs boldı.
JASLAR XORÍ
Qan keshken qáhárli, jalınlı jıllarda,
Jan bergen keleshek áwladtıń baxtı ushın,
Mıń alǵıs, jaslardan, qaharman ullarǵa,
Gúresken ayanbay xalıq ushın bar kúshin.
Atalar miyrası — jeńimpaz bayraqlar,
Jeńisten jeńiske jelbirep keledi.
Aparıp sahraǵa náwpir suw, náwbáhár,
Tıńlarǵa, shıńlarǵa shanshılar ele de!
Awılda, qalada biz benen saltanat,
Biz — jaslar, jańa GES otların jaǵamız.
Biz benen ómir shad, biz benen xalıq abad,
Kosmosqa lashınday qanatlar kaǵamız.
Jańadan jańaǵa atlanıw — saltımız.
Súren sol: — Kel joldas,aldıńǵı sapta bol!
Watanǵa sadıqlıq-ádiwli antımız
Biz jaslar, talmas kúsh, Leninshil komsomol!
Partiya kúnimiz, biz oǵan inimiz,
Baslaydı aydın jol, arzıwlı saparǵa.
Tınıshlıq, joldaslıq ortalıq tilimiz,
Kel jáhán jasları, qosılıń qatarǵa!