Gulistan Annaklicheva
Annaklicheva Gulistan Axmedovna 1983-jılı “Ózbekstan Respublikasına xızmet kórsetken mádeniyat xızmetkeri” húrmetli ataǵı hám 2016-jılı “Fidokorona xizmatlari uchun”, 2023-jılı “Mehnat shuhrati” ordenleri menen sıylıqlanǵan.
Miynet stajı 61 jıl.
“Qaraqalpaq ádebiyatı” gazetasınıń juwaplı redaktorı sıpatında 2025-jıldan berli islep kelmekte.
G.Annaklicheva óziniń jurnalistlik jumısın oqıwshı jıllarınan Tórtkúl rayonı jergilikli radioesittiriwlerinde sheshenlikten baslaǵan.
G.Annaklicheva 1980–1982 hám 1982–1984-jıllarda xalıq deputatları Tórtkúl qalalıq hám rayonlıq keńesiniń deputatı, 1984–2015-jıllar dawamında, 6 shaqırıqta Qaraqalpaqstan Respublikası Joqarǵı Keńesine, 2005–2010-jıllarda Ózbekstan Respublikası Nızamshılıq Palatasına deputat hám 2015–2024-jıllarda 2 shaqırıqta Ózbekstan Respublikası Oliy Majlisi Senatınıń aǵzası etip saylanıp, parlament iskerligin jetilistiriwde úlken tájiriybe toplaǵan. 45 jıldan berli úzliksiz deputat bolıp saylanıp kelgen.
G.Annaklicheva kóp qırlı dóretiwshi hám joqarı tájiriybeli jurnalist sıpatında mámleketimizde ámelge asırılıp atırǵan keń kólemli reformalardıń mazmun-mánisin hám qolǵa kirgizilip atırǵan úlken jetiskenliklerdi xalıq arasında úgit-násiyatlaw, jaslardı watansúyiwshilik ruwxında tárbiyalaw baǵdarında nátiyjeli dóretiwshilik etip kelmekte.
Onıń dóretiwshiligi, ásirese, ǵárezsizlik jıllarında joqarı basqıshqa kóterilip, óz shıǵarmalarında eldiń tınıshlıǵı, ana Watanǵa muhabbat, milliy maqtanısh sezimlerin joqarı kórkem sheberlik penen sáwlelendirgen jarqın dóretiwshi sıpatında elimiz ádebiy jámiechiligi arasında húrmet-itibarǵa erisken.
G.Annaklicheva mámleketimizdiń “Mádeniy esteliklerdi alıp kiriw hám alıp shıǵıw haqqında”ǵı hám usı tarawdaǵı basqa da nızamlar boyınsha xalıqaralıq huqıq normaların tereń úyrenip, usı nızamǵa bir qatar ózgerisler hám qosımshalar kirgizip, usınısların bergen hám usı tarawdaǵı nızamlar qabıl etiliwinde belsene qatnasqan.
Jazıwshınıń qálemine tiyisli shıǵarmaların kitapqumarlar qızıǵıwshılıq penen oqıydı. Onıń Tashkent hám Nókiste 37 kitabı ózbek, qaraqalpaq, rus tillerinde – sonıń ishinde “Hayajonning yetti rangi” (1982), “Oydin ostona” (1983), “Sevib qolsin” (1985), “Daryoga botayotgan quyosh” (1998), “Izlaganlarim” (2002), “Oybaldoq” (2001), “Muhabbat yurti” (2002), “Ota uyim” (2015), “Uyg‘onish nashidasi” (2016), “Guloyim” (2017), “Saylanma” 3 tomlik (2018), “Senga o‘xshagim kelar” (2019) “Qaraqalpaqstan” baspasında “Baxt keltirgan bahor” (1979), “Земля отцов” (1986), “Júrek penen júzbe júz” (1987), “Nurlı jollar” (1988), “Прекрасное чувство” (1989), “Aytgin menga To‘rtko‘l haqida” (1993), “Men sen uchun yashayapman” (1993), “Ámiw jaǵasında ósken bayterek” (1994), “Intizarliq” (1995), “Yo‘llaringga chiqdim” (1997), “Qalb zuraati” (2004), “Qaytmoq uchun ketmoqdaman” (2007), “Vatan ruhi” (2011), “Избранное. 1-2 том”, “Saz saltanatınıń sárdarı” (2017), “Guldaste” (2018), «Jańalanǵan Qaraqalpaq diyarım» (2020), “Maxtimquli. I-II tomlik”, “Ko‘ksimdagi nur” (2022), “Qoraqalpoq kengliklarida” (2023), “Qismat qissalari” (2024) sıyaqlı poeziyalıq hám prozalıq shıǵarmaları zaman ruwxı, ǵárezsizlik ideyaları, elimizdiń tariyxı, xalqımızdıń dóretiwshilik, qurılıs miynetleri, ásirese Qaraqalpaqstannıń rawajlanıwı sadıqlıq hám pidayılıq, mehir-muhabbat penen qálemge alınǵan hám qánigeler menen kitapqumarlar qálbinen tereń orın alǵan.
2019-jılı shayırdıń “Gúlayım” operası ushın librettosı kompozitor N.Muhammeddinov penen birgelikte saxnaǵa qoyıldı.
G.Annaklichevanıń rus tillerinde basıp shıǵarılǵan, “Земля отцов”, “Прекрасное чувство” qosıq hám prozalıq toplamları, sonday-aq, internettegi “Стихи РУ”, “Проза РУ” saytlarında járiyalanǵan 300 den aslam prozalıq hám poeziyalıq shıǵarmaları ushın “Искусство народов мира” Xalıqaralıq associaciyasınıń laureatı bolıwǵa miyasar bolǵan.
Shayırdıń Respublikamızdıń gazeta-jurnallarında basıp shıǵarılǵan publicistikalıq maqalaları hám qosıqları Watan, ǵárezsizlik, muhabbat, doslıq hám jas áwladtı tuwılǵan jerine sadıqlıqqa shaqıradı.
G.Annaklicheva 1966-jılı Zulfiya Israilova menen tanısqan dáslepki waqıtlarınan baslap Zulfiyanıń Qaraqalpaqstandaǵı qızı sıpatında “Saodat” jurnalında bir qatar lirikalıq dúrkinleri basılıp shıǵıp, Zulfiyanıń sońǵı demlerine shekem oǵan únles bolıp kelgen. Zulfiya Israilova óziniń qosıqlar toplamlarında “Meniń úmitli shayırım, súyikli Gúlistanbegim, úlken-úlken mushayralarda hawazıńız jańlap tursın” dep G.Annaklichevaǵa bolǵan húrmetin usı tárizde bildirgen.
Ol sońǵı jılları ózbek ádebiyatınıń kórkem biybaha úlgilerin qaraqalpaq tiline awdarıw babında ustazı Zulfiya qálemine tiyisli “Xotiram siniqlari” poemasın, bir qatar qosıqların qaraqalpaq tiline awdarǵan.
Sonday-aq, G.A.Annaklicheva kinoscenarist sıpatında da jetiskenliklerge erisip kelmekte. Ol “Mehirli dúnya”, “Táǵdir jolları”, “Gúlayım hám Arıslan”, “Ústirtke jol” kinoscenariyleriniń avtorı. “Ózbekfilm” kinostudiyasında belgili rejissyor A.Ǵaniev penen birgelikte “Ústirtke jol” kórkem filmi jaratıldı.
G.Annaklicheva “Qoraqalpog‘iston tongi” hám «Qaraqalpaq ádebiyatı» gazetalarınıń bas redaktorı sıpatında gazetanı mazmunı jaǵınan bayıtıw, mámleketimizdiń sociallıq-ekonomikalıq tarawlarında ámelge asırılıp atırǵan reformalardı keńnen sáwlelendiriw baǵdarında da sistemalı jumıslardı alıp bardı.
Onıń tikkeley basshılıǵında gazetada mámleketlik baǵdarlamalardıń mazmunınan kelip shıqqan halda “Kekseleri qádirlengen el”, “Bárkamal áwlad”, “Salamat bala – salamat keleshek”, “Bekkem shańaraq” arnawlı rubrikaları shólkemlestirilip, sońǵı úsh jılda ilimpazlar hám qánigeler, belgili dóretiwshilerdiń usı temalardaǵı 500 den aslam áhmiyetli maqalaları basıp shıǵarılǵan.
Gazeta internette óziniń veb-saytına iye bolıp, 2013-jılı Ózbekstan Jurnalistleri dóretiwshilik awqamı tárepinen ótkerilgen “Baspa basılımnıń eń jaqsı veb-saytı” tańlawınıń Qaraqalpaqstan Respublikası basqıshında jeńimpazlıqtı qolǵa kirgizgen.
Ámelge asırılǵan keń kólemli ilajlar nátiyjesinde sońǵı úsh jılda gazeta tirajı 2 esege ósip, 7 mıń nusqanı quraǵan.
Onıń baslaması menen “Qoraqalpog‘iston tongi” gazetası janında “Gúlayım” qosımsha basılımı da shólkemlestirilip, ana hám bala salamatlıǵı, jaslar tárbiyası, hayal-qızlar hám shańaraq, ádebiyat-kórkem óner, bilimlendiriw sıyaqlı sociallıq baǵdarlarda qızıqlı hám mazmunlı maqalalar berip barılǵan.
Sonday-aq, 2011-jılı Qaraqalpaqstanda jasap dóretiwshilik etip atırǵan jazıwshı hám shayırlar jáne ádebiyat jankúyerleri ushın 4 tilde (qaraqalpaq, ózbek, rus, inglis) shıǵatuǵın “Qaraqalpaq ádebiyatı” gazetası shólkemlestirilip, xalıqtıń túrli qatlamları arasında óz oqıwshıların tapqan.
“Qaraqalpaq ádebiyatı” gazetasın jáne de keńirek hám mazmunlı etip shıǵarıw, jaslar dóretiwshiligine kóbirek itibar qaratıwdı názerde tutıp, 2014-jılı Ózbekstan Respublikası Oliy Majlisi janındaǵı mámleketlik emes kommerciyalıq emes shólkemlerdi hám puqaralıq jámiyetiniń basqa da institutların qollap-quwatlaw jámiyetlik fondınıń 15 million sumǵa shamalas grantın alıwǵa miyasar bolǵan.
G.Annaklicheva respublikada turaqlı túrde ótkerilip kiyatırǵan bir qatar tańlawlar, Zulfiya atındaǵı mámleketlik sıylıqtıń tóreshiler quramınıń belsendi aǵzası sıpatında Zulfiya izbasarların tabıwda ádil sheshimi menen húrmetke erisip kelmekte.
Tikkeley G.Annaklichevanıń baslaması hám basshılıǵında keyingi úsh jılda belgili shayırlarımız, Berdaq, Ájiniyaz, Maqtumqulı, Muhammad Yusuf, Zulfiya Israilovanıń ómiri hám dóretiwshiligi haqqında jas jurnalistler, dóretiwshiler menen birgelikte 10 nan aslam seminar hám dógerek sáwbetleri ótkerilgen.
G.Annaklicheva Qaraqalpaqstan teleradiokanalı, ǵalaba xabar qurallarında “Kim edik-u, kim bo‘ldik”, “Hayal dárejesi”, Ózbekstan televideniesiniń “Mahalla” telekanalınıń “Shukrona” telekórsetiwinde hám esittiriwlerinde usı temada sáwbet hám qosıqları, Ózbekstan televideniesinde “Saylov – demokratiya ko‘zgusi” telekórsetiwinde, “Nawrız Qaraqalpaqstanda” esittiriwinde qosıqları menen shıqqan.
Shayır qálemine tiyisli dóretiwshilik úlgiler kásip-óner kolledjleri hám akademiyalıq liceylerdiń sabaqlıqlarına kirgizilgen.
Búgingi kúnde 120 dan aslam shákirtleri respublikanıń mádeniyat, ádebiyat hám kórkem óner tarawın rawajlandırıw jolında nátiyjeli miynet etip kelmekte.
G.Annaklichevanıń miynetleri húkimetimiz tárepinen múnásip bahalanıp 2002-jılı “Qaraqalpaqstan Respublikası xalıq shayırı” húrmetli ataǵı menen sıylıqlanǵan.
Onıń 50 ge shamalas qosıqlarına muzıka jazılıp, búgingi kúnde belgili qosıqshılar tárepinen atqarıp kelinbekte.
G.Annaklicheva Ózbekstan Respublikası Prezidenti menen bolıp ótken ushırasıwda óziniń haqkewilligi, ózbek hám qaraqalpaq qızınıń iybesin, ana mehri hám Watanǵa bolǵan perzentlik minnetin bildirip, Húrmetli Prezidentimizdiń húrmetine erisken.
G.Annaklichevanıń miynet jolı hám dóretiwshiligi shın mánisindegi watansúyiwshilik ideyalarına suwǵarılǵan hám elimizdiń rawajlanıwı jolındaǵı iygilikli islerge únles bolıp esaplanadı.
Tájiriybeli jurnalist, pidayı insan hám jámiyet belsendisi sıpatında ádebiyat tarawı wákilleri hám keń jámiyetshilik arasında húrmetke erisken.
Shańaraqlı. 4 ul, 2 qız, 13 aqlıq, 10 shawlıǵı bar. Ul-qızları hám erjetken aqlıqları joqarı maǵlıwmatlı.